قصيدة المواطن أحمد محمد سلامة

قصيدة المواطن أحمد محمد سلامة

للشاعر الأمير عبد الرحمن بن مساعد

(الرابط)

http://www.youtube.com/watch?v=3D6WsSDcbR8

المواطن أحمد محمد سلامة

في زمن وهمي من الأزمان
كان وياما ياما كان ..
سلطنه وسلطان ..
وفي يوم من الايام..
يتصفح السلطان الجريده ..
موضوع يسترعي اهتمامه ..
أحمد محمد سلامة..
فرد من أفراد شعبه ..
يائس وأوضاعه صعبه ..
في الصبح يشتغل بواب ..
في مدرسة اطفال..
وفي اليل يشتغل شيال ..
عنده ثلاثة عيال ..
فيهم مرض نادر عضال ..
ماله علاج الى في بلدان بعيده ..
كلفته ما يحتملها وفاقته أصلا شديده ..
انسدت الدنيا امامه ..
وارتأى ان الطريق الوحيده ..
لفتح ابواب الامل ..
انه يوجه ندا.. عبر الجريده ..
لأهل الكرم .. وأهل الشهامه ..
تبرق .. في عين سلطان البلاد غمامه ..
ويهطل الدمع من عينه ..
يمسح الدمع بكفوفه ..
ويخلع العمامه..
ويرفع للسماء رأسه ..
ويقول ..
ياربي الفرد الصمد ..
ستركـ وعفوكـ ..
ألهتنا عن الناس ..
أمور الحكم والسياسه ..

ينادي سلطان البلد ..
يا حاجب ..
استدعي معالي وزير السلطة الاول .. رعد ..

يجي رعد ..ويبدي ولاءه واحترامه..
-صاحب المجد والكرامه ..
سيدي السلطان امرك ..

- أي كرامة يارعد ..أي كرامه ..
والمواطن في البلد .. ضائع مقامه ..
اتركك عن هالحكي ..واسمعني زين ..
هاذي مليونين خذها..
وصلها لمحمد سلامه ..
أحمد محمد سلامه..
خذ الجريدة .. تلقى التفاصيل في الجريده ..
لكن اسمع يارعد .. ما أبي يدري احد ..
أحذرك ..لاصحافه ..ولاجرايد ..
هذي لوجه الله ابيها ..
ويعلم الله .. من وراها ..
ما أبي مدح وقصايد ..
أرتجي عفو الكريم ..
في يوم بالأهوال زايد ..

سيدي السلطان خيرك في القديم وفي الجديد ..
ربي يجزيك المثوبه .. ويعينك بوقت الشدايد ..

-يخرج رعد .. ويستدعي وزير المال والأحوال ..
مرسال ..
يجي مرسال .. امركـ يامعالي وزير السلطنه الاول ..

تعال يا مرسال .. فورا وفي الحال ..
خذ المليون هذا..

 
وسلموه ..للمواطن احمد محمد سلامة ..من سيدي السلطان ..
خذ الجريده .. تلقى التفاصيل في الجريده ..
مرسال ..لابد هذا يتم الأن .. فورا وفي الحال..
وبأقصى درجات السريه والكتمان ..
هذي اوامر سيدي السلطان ..

يخرج مرسال .. ويستدعي كبير الحراس ..
فراس .. يجي فراس .ز
أمرك يا وزير المال والأحوال..
-فراس .. تعال ..
خذ هذي خمسمية الف ..
سلموها..المواطن أحمد محمد سلامة ..
من سيدي السلطان ..
خذ الجريده ..
تلاقي التفاصيل في الجريده ..
خذها الن ..
فورا وفي الحال سلمها ..
وبأقصى درجات السريه والكتمان ..
هذي اوامر سيدي السلطان ..

يخرج فراس.. ويستدعي النقيب ..
حبيب ..
يجي حبيب .. أمرك ياكبير الحرس ..
-حبيب تعال..
خذ هذي المية الف ..
سلموها للمواطن..أحمد محمد سلامة .. من سيدي السلطان ..
خذ الجريده ..تلقى التفاصيل في الجريده ..
خذها الآن سلمها ..فورا وفي الحال..
وبأقصى درجات السريه والكتمان ..
هذي أوامر سيدي السلطان ..

يخرج حبيب ..
ويستدعي مسؤول المساكن ..
مازن ..
-مازن .. تعال .. خذ الخمسين الف هذي ..
سلموها للمواطن.. أحمد محمد سلامه ..من سيدي السلطان ..
خذ الجريده.. تلقى التفاصيل في الجريده ..
خذها الآن سلمها.. وفورا وفي الحال..
وبأقصى درجات السريه والكتمان .. هذي اوامر سيدنا السلطان ..

يخرج مازن .. ويستدعي رئيس الحي ..
الل ساكن فيه أحمد..
عبد الحي ..
يجي عبد الحي ..
-عبد الحي تعال
خذ هالعشرين الف ..
سلموها للمواطن .. أحمد سلامه ..



خذ الجريده تلقى التفاصيل في الجريده ..
خذها الآن .. وسلمها لأحمد سلامه ..
هذي اوامر سيدنا السلطان ..

يخرج عبد الحي ..
ويتوجه لمكتبه في الحي ..
ويستدعي مساعده أمين ..
-تعال يا امين .. تعال .. شوف الجريده ..
وخذ الألف هذي ..
سلمها لأحمد سلامه ..
ساكن هناك ..عماره في اخر الشارع ..
جنب مدرسة الكرامه ..
الدور الرابع ..شقه سته ..
وديها الآن .. وقل له ..
هذي من سيدنا السلطان ..
وأسمع ياامين ..
احرص على السريه والكتمان ..
هذي اوامر سيدنا السلطان ..

أمين واقف ورا باب الشقه ..
أحمد محمد سلامه ..
يدق الباب ..
صوت من خلف الباب ..
-مين ..
-انا امين .. مساعد رئيس الحي .. عبد الحي ..
يفتح الباب .. أهلين وسهلين..
هذا بيت احمد محمد سلامة ؟؟
نعم ..أنا احمد محمد سلامة
أحمد محمد سلامة ؟..
أحمد محمد سلامه ..
-ممكن إثبات ..
طبعا .. أكيد ..
-فعلا احمد محمد سلامه ..
سيدنا السلطان موضوعك استرعى اهتمامه ..
سيدنا السلطان بيسلم عليك
وحب يطمن عليك
وكلفنا ننقل لك رسالة :
سيدنا السلطان .. أدام الله ايامك ..
يتمنى للاطفال عندك ..
كل الشفا وكل السلامه ..

مبروك يا أحمد تستاهل ..
مع السلامه ..